لملمي جراحك

لملمي جراحك يا بنية عيشي لسه الأيام جاية
شيلي حزنك من جوا قلبك متفكريش أبدا ولا ثانية
و أملي بالفرحة الحياة تبعدك عن كل آه
و حلي الدنيا بغناكي
*************
أكسري بالفجر حلمك أهربي من يأس وهمك
رشي ضحكك في الآثير و أملكي الكون الكبير
وأملي بالفرحة الحياة تبعدك عن كل آه
و حلي الدنيا بغناكي

ملهاش حل

متشبكة و متعقدة
من كل ناحية ملبكة
متلخبطة و متكركبة
و فوق دماغنا مدربكة
هايصة و ليصة و متكعبلة
و ملهاش حل و علقنا ضل
ويا الحقيقة المتفبركة
*****************
يا دنيا ليه تايهة بينا
و ليه مبكية عنينا
متهدي خطاويكي شويا
بدال ما تدوسي علينا
و تجرحي المجروح أكتر
و تدبحي المدبوح تاني
و تنسي أننا مش أكتر
من .. بشر ضعيف و اناني
معصوبة عينيه و مغصوبة أيديه
وحياته سكة و متسددة
ملهاش حل و علقه فيها ضل
ويا الحقيقة المتفبركة
*******************
يا زمنا ليه ديماً قاسي
بتغربنا و عامل ناسي
عمال علينا تتفرج
و كأننا بشر أجرب
و خدنا وياك و ماشين
متخبطين شمال و يمين
و بقينا عندك مش فارقين
يا زمنا يابو قلب قاسي
مليان مناصب و كراسي
ملناش مكان أبداً فيها
و العمر ضاع فالمراسي
ملهوش حل و عقلنا ضل
ويا الحقيقة المتفبركة
متعقدة

بنفخ في قربة مقطوعة

تعالي ياما ألحقيني
عايزني أخون اليلد دي
عايزين يجندوني
عايزني أغير مبادئي
قولتلهم لأ قالولي
مش بمزاجك يا صاحبي
وافقت و قلت لازم أرجع أرد بطريقتي

أنا رزقي ع اللي خلقني مش ع الحزب الوطني
لو مت فيوم مالجوع حيقوللي طب إيه يعني

أنا رزقي على الرزاق مش على حزب سياسي
لو نمت فيوم متشرد حيقول يا سيدي و أنا مالي

الناس نامت في الشارع
علشان مش لاقين مأوى
و الحي يا عيني ساكت
قال لا حول ولا قوة
و الحق فيكي ضايع
على إيد كل العتولة
جيت أتكلم و أناقش
قالولي أسكت يابن الهرمة
قولتلهم لأ مش ساكت
أنا ليا عادل عارف

دأنا رزقي على الرزاق مش على حد فتوة
عايش في الدنيا عوالة على نهب و سلب و سرقة

أنا رزقي على الرزاق ع الفتاح العليم
اللي شايفهم سارقين و فايتين لينا الملاليم

سفير و نائب فاضل
مالمجلس خارج داخل
دايسين ع الناس في الأرض
و يقولوا الناس تستاهل
آل إيه عايزين حقوقهم
و كمان بيطالبه بيها
بيطالبه بالتغيير
علشان تحلو العيشة
قولتلهم دا التغيير
لحمة و رزق و معيشة

مأنا رزقي على الرزاق مش على واحد أناني
عمال في اللحمة ياكل و سايبني في فقري أعاني

أنا رزقي على الرزاق مش على حبة سكارى
واكلينها تملي والعة و أل إيه فاكرينها شطارة

و حنعمل إيه في ناس
أقوى من الحجارة
لا عندهم إحساس
قادرة أوي و جبارة
مش عايزة في يوم ترحم
و لا حتى تسيب رحمته الغفارة

و راجعة يا بلد للثورة
في رجال متخفيين
آل إيه هما يعني
على مصلحتك خايفين
أهيف ما فيهم واحد
ألعن مالشياطين
و كل اللي يهمهم
منك إيه واخدين

قوت الشعب الوالع
اللي في دروبك ضايع
ينتع من أول يومه
على كام ملطوش مش نافع

على أيدهم شايف نهايتي
و أرجع أعيد حكايتي

أنا رزقي على الرحمن اللي لا بينام ولا يغفل
أنا رزقي على الرزاق اللي ديما بيسهل

دأنا رزقي على اللي خلقني عالم الباطن و الظاهر
أنا أقوى بيه و مش مستني من حد جبر الخواطر


أنا وطني أه .. أنما حزبي لأ

من مقالاتي - واقفة معرفش فين

يا عوضين لازم تبطل خلفة كتر العيال مش فلاحة ولا جدعنة ، يا اما ده عنده عيال يا اما انا مش عاوزاه
بجد عيب عليك تتهرب من مستحقات الدولة ، يا حسن يا علي يا عمر يا محمد با أحمد يا ناني يا نسمة يا عديلة
يا يا يا ...، تعالوا هنا يلا معايا كلنا لازم نقف واقفة مصرية واحدة ,
بس قولوا لي أنت عارفين هي عاملة أزاي ؟ و الله أنا بحثت كتير على النت و في المراجع و رجعت لأيام الفراعنة ملاقيتش واقفة مصرية معروف لها أساس أو سبب ـ مهو أنا عاوز أعرف زي غيري من اللي عاوزين يعرفوا برضه هو أحنا غاويين منظرة ولا فشخرة ولا غاويين نضحك على روحنا و على بعض بجد المسئلة بقيت خلطبيطة و عك ملهوش آخر يا عني أحنا نفضل نصرف في إعلانات توعية و ننتع في قلوبنا و في الأخر نكتشف أننا لم نصل إلى نتيجة يبقى ده مش حرام و الله ولا هو مال سايب و السلام طبعاً طبعاً أنا عارف و أحنا كلنا عارفين الفلوس دي راحت فين بالضبط بقى هي يعني إعلانات التوعية الزراعية و إعلانات الخلفة خلاص هي الحل طيب أحنا ليه منفكرش في حل أفيد من الوقفات الغريبة اللي مش مفهوملها أي حاجة خالص ولا حد عارف يقفها من الأساس
و الواحد بقى مش عارف يلاقيها منين ولا منين وقفة عشان الناس تبطل تخلف و و قفة عشان الناس تلتزم بالضراير أه أقصد الضرايب و وقفة تالتة عشان السكر الأبيض و محدش فكر يقف واقفة واحدة و يسئل هي فلوس الوقفات دي كلها قصدي الإعلانات دي كلها و اللي أكدت الدراسات أنه تم صرف حوالي مبلغ 300 مليون جينيه عليها و لم تحقق الغرض منها و تنجح في المهمة التي خصصت لها يعني أكيد التلت أو أربع إعلانات متكلفوش كل المبلغ ده حتي لو كانوا عشرات الإعلانات برضه متكلفوش المبلغ ده مهو مش معقول حنكلف إعلان مش حيجيب دخل مبالغ زي دي مهو احنا هبل أيوة بس بحساب برضه و أنا فاهم و أنتوا فاهمين الفلوس دي نصها راح فين بالضبط بجد حاجة تعكنن المهم أنا لما أحتارت و سئلني صديق ليا و قولته متعرفش يا خويا والنبي الوقفة دي أصلاً ظروفها إيه قالي و الله أنا معرفش غير آدي واقفة المجنونة يابا يابا ع المجنونة و سلملي على الطوابير مع تحياتنا لفرقة رضا

معرفش أسكت 2 - اللي حصلي

أنا بَتات في أفكاري طول الوقت
حكومة و شعب يا نهاري ولا لاقي وقت
كل اللي يشوفني يقوللي
التيتة دي مش لايقة عليك
تعالى سيب نفسك
و انا تيتك
بشكل و الله يليق بيك
مع كل فاتورة كهربا بيتيتوني
و فكل حتة بروحها يا ناس بيلحقوني
واحد تايتني فأفكاري
و التانية عامل ولا داري
لو روحت مصلحة يتتوني
بدمغات كتير ولا ليها داعي
تعبت والله من كتر التيت
اللي وصلني لحد البيت
دأنا مرة قولت أقول رأيي
لأتني بتات كده من ظهري
زميلي في الشغل بيتتني
عشان منصب و ترقية

و جاري تحتي بيتتني
عشان نقّط عليه من غسيل الجلابية
و أبني أستاذه بيتيته في الأمتحانات
بيجبله من برا المنهج بدل السؤال والله سؤلات
في رغيف العيش تَيتنا عشان منكلش
و كمان والله فصحتنا عشان منقمش
وليه يا بلدنا
بقيتي فكل حاجة بتتينا
و كل ما نبعد عنك تنادينا
تقولي تعالوا بينا يا ولادي نتصالح
و أتاريكي أصلا عايزة من تاني تتتينا
تتتينا .. تموتينا
تتتينا .. تقسينا .. تنسينا
و ديماً معاكي تغلبينا
و أن يوم أو لحظة بنتكلم
على طول تجيبي الحق و اللوم علينا

هل هلالك يا رمضان

رمضان .. رمضان
هل هلالك شهر مبارك
هل هلالك يا رمضان
نورك بهجة و عطرك بركة
يا أجمل وهبة من الرحمن
فيك الخير و الحب كتير
فيك الرحمة و الغفران
يا رمضان ..
****************
لياليك الحلوة بتجمعنا
و حكاويك للصبح تمتعنا
و بصلواتك و تسبيحاتك
تتهنى قلوبنا و ترتاح
فيك الذكر و فيك الطاعة
و المغفرة دي حصون مناعة
و بصدقاتك و بذكاتك
يتحول حزننا أفراح
فيك الخير و الحب كتير
فيك الرحمة و الغفران
يا رمضان

رباعيات 2010 - 1

1
نفسي أموت
نفسي أموت
نفسي أموت أكتر و أكتر
نفسي أدوب أكتر و أكتر
وعن عيون الناس أغيب
و على حبك أقدر
نفسي أشهر الليل عشانك
وأسجد يا غالي فمحراب إيمانك
و لحضنك يا رب تقربني
و على نفسي يا رب تقدرني
نفسي اللي منك خدتني
و ياما عنك شغلتني
و بعدتني .. من غير ما أفكر
*********************
2
يا رب أنت الحكم العدل
أنت اللي وحدك بتسامح
يا خالق كل هذا الكون
أجعلني فملكوتك سابح
خليني عايش في رحابك
وأغسل ذنوبي فمحرابك
ياللي مبتنساش مظلوم
ولا يوم بتسيب الظالم
وحدك أنت بس يا رب
بتقبل كل المظالم
********************
3
قالو العقل في التفكير
و رب العبد في التدبير
وأنا من ضعفي و قلة حيلتي
بندهلك يا رب تعيني
تقويني نقوي عزيمتي
و مكونش يارب مالضالين

رباعيات 2010 - 2

4
أنا يا رب من ضعفي
بغلط و ذنوبي عمياني
و بلجألك عشان عارف
حتحميني و ترعاني
تنسيني هموم قلبي
تيسر لي أوام أمري
و تغفرلي .. يا ربي
**************
5
خلقتنا بشر
و خلقت فينا الضعف
و بقدرتك يا رب ديماً
بتشملنا بالعطف
**************
6
من ضعفنا بنغلط يا رب
و بقدرتك بتسامحنا
و فحزننا بنبكي يا رب
و بعطفك أنت تراضينا
بتداوي فجروحنا
و الرحمة تهدينا
إحنا بشر .. و أنت الوحيد
اللي فأيديك العفو
**************
7
بيوت كتيرة عمرانا
بخير الواحد المنان
عطايا و ذكر و عبادة
بنورك أنت يا رحمن
بتوهبها و تجعلنا
سبب علشان نوصلها
للمحتاج في كل مكان
**************
8
الطير بيسبح في سماك
و أنا بطلب يا ربي رضاك
بصليلك و بدعيلك
همومي تشلها تراتيلك
و لو روحي في يوم كلت
و لو تعبت و لو ملت
بيكفيني يا رب حماك

بنعمتك

بنعمتك يا رب
على طول مهنيني
و برحمتك يارب
على طول بتحميني
أبعد عنك تفتكرني
و تحاول ليك ترجعني
أغلط تغفر .. و ذنوبي تكتر
و تغفر أكتر .. أكتر يا رب
يا خالق عمري و سنيني
*******************
على طول تاخدني الدنيا
ألاقيك بتناديني
وأن ضل طريقي بيا
نورك بيهديني
ديماً شايلي الخير
و أنا بعذب نفسي
بضعف و ضعفي كتير
قدامك بيكسفني
أغلط تغفر .. و ذنوبي تكتر
و تغفر أكتر .. أكتر يارب
يا خالق عمري و سنيني

أنا قبطي

أنا قبطي أنا مصري
أمي و أبويا و جدودي
ودي بلدي

أنا الشارع أنا الرصفان
أنا الحارة أنا الجدران
أنا الصليب مع المدنا
أنا الأنجيل مع القرآن
أنا المصري

أنا الإيمان أنا القوة
أنا الحياة و أنا الرحمة
أنا الحكايات وسط الزحمة
أنا الشمس اللي قبل ما تغرب
ديما بتقول جاي بكرة
دانا المصري

أنا قبطي أنا المصري
أمي و أبويا و جدودي
و دي بلدي

أنا الأضرحة و يا المعابد
أنا الكنائس جنب المساجد
أنا اللي فايت ذكري
مطرح ماراح أو كان
أنا الحضارة اللي أبتدت
من أول بدايات الزمان
أنا المصري

أنا البنا أنا المعمار
أنا اللهب
اللي جاي م النار
و لو تحتاجني
تلقاني وسط الأزمة

أنا قبطي أنا المصري
عمري ما بنسي جزوري
ولا أصلي
أنا القلوب الصافية في عشرتها
أنا الصحبة الطيبة
اللي دايبة بمحبتها
أنا النيل فجضن الحجارة
أنا التاريخ وسط الحضارة
أنا المصري

أنا اللي وقت مينادي عليا السيف
بلبي الندا أوام و من غير خوف
أنا اللي كل الناس بتعشقني
و لما تبعد عني تشتقلي
و ديما تلاقيني
سايب عندهم ذكرى
مأنا المصري

أنا قبطي أنا المصري
في كل حتة بتعرف
بريحة بلدي
أنا اللي سمار الشمس ف جبيني
أنا اللي لون طمي النيل ده لوني
أنا العرق اللي نازل ع الجبين
من عزم الفاس
أنا صوت الأذان اللي بيعانق
صوت الأجراس
أنا المصري

أنا الأميرة اللي بارت
من كتر خطبها
أنا الأفراح جوا الأحزان
أنا الغنوة اللي بضحك بيها
على الزمان
و فوق الشدايد بتلقاني أنا الفكرة
دانا المصري

أنا ضي القمر الفضي
اللي بان ع النيل
أنا نبع الأصالة
من ألف جيل ورا جيل
أنا الأوتار و أنا الألحان
و غنا المواويل
و كل من يجيلي
يلقاني حضن و دليل
دانا المصري

تخاريف في عز الفجر

أنا حالة .. أنا فكرة
أنا طريق
ماشي فيا الكلام
ضايع ملهوش صديق
أنا لحظة ما قولت خلاص
حتيجي الفرصة و حبتدي
قاللي الزمان .. خلاص
رتحت عليك الفرصة يا شاطر
و متفكرش تشتري
و حتشتري إيه إذا كان الكلام
ساكت في قلوب الناس
ملهوش لحس ولا طعم
ولا حتى قوام
ماسخ بايخ زي طعم الأيام
أيامنا اللي كانت حلوة زمان
و قولنا حتحلو أكتر
و حتبتدي تزهر و زرعها يبان
زرعها اللي كان في قلوبنا
زي نور الشمس اول ما يشقشق
على المحروم الغلبان
بس يا خسارة الحلم دبل
و اندفن قبل الأوان
من غير حتى ما يموت
و قبل ما نور الفرحة يبان
مين قال أني مش متفائل
دانا حتى عشري أوي و متساهل
***************************
أكمل لكم الحكاية
و الا أنتوا عارفين اللي فيها
فهمينها و فاهمين حوارتها
ولفين حواريها
حواريها و حورتها و حواريها
أيوة تاني
أيوة تاني و تاني و تاني
حواريها اللي ياما فيها و فيها
من كل صنف أشكال و ألوان
فيها اللي باين و المستخبي
و اللي خايف يبان و يطلع
من جحوره لتاكله الحيتان
الحيتان ..
اللي بلعين في كرشهم ياما
اللي راسمين و مخبين في جربهم
و عبهم ياما
اللي دايسين على دماغنا
و مدينا بالجزمة
و معلمين ميت ألف مليون علامة
و ياما و ياما و ياما
*************************
أكمل لكم ولا كفاية
أكمل لكم ولا حرام
ولا نضرب تحت الحزام
أكمل لكم ولا كفاية
ولا أقول لكم زي ريا
كملوا لأخر الكباية
وأشربوا السم اللي فيها
أشربوه للنهاية
سم للنهاية
و دي مش أخر الحكاية
سم في الأفكار .. سم زي النار
بيلسع و يحرق قبل ما يموت
قبل ما يموت فينا
كل حته و كل حاجة لسه عايشة
رغم الجسارة .. رغم القدارة
رغم الإهانة و المهانة و القزارة
*****************************
أكمل ولا أسكت
ولا أقولكم أنا زهقت
حد غيري يكمل
لأحسن أنا مليت و تعبت
ولا أقولكم خلاص
أنا اللي حكمل
مهو لازم يبقى فيه واحد
واحد بس هو اللي يضحي
و يتبهدل و يتحمل
يتحمل عشان خاطر ناس
ناس .. مش عايزة تفهم
ولا تتحمل
طول النهار عاملة جدعة
و هي بس يدوب
بتحاول تتجمل
و أتاريها زي الريسة في الهوا
من نفخة تطير ولا تتكلم
و حكملكم و احكلم تاني
بس مش دلوقت
أصلي انا بقى دلوقت
قررت أقف عن الكلام أنا كمان
ولا أتكلم
و خايف تكونوا زهكنم أو مليتم
أو أكون أنا واحد مجنون
بيخرف أو بيستهبل
ولا تمت ولا بينها حتم

معرفش أسكت 3- سؤال لبلدي

ياللي كنتي بلد الألف مأذنة
و صبحتي بلد المليون دش
شعبك معدش نافع
خرب عمال بيوش
بيوش و يغش
طالع نازل بمليون وش
من كتر حبك يا بلدي
بقيتي ماشية تلطشي
كل واحد بقلم ع الوش
قلم في طابور العيش
و قلم علشان نعيش
و قلم كمان بقشيش
و قلم في ضرايب
رايحة و جاية بزيادة مبتنتهيش
و قلم في كل حصة
و فكل حارة و كل ناصية
و نتكلم يقولولنا تعليمنا دا ريادة
تعبنا و الله و كلّينا
و من كتر تعبنا ملينا
مبقتش الناس عارف
تشوفنا و الله بأي وش
الوش الموجوع ولا الوش المفزوع
ولا الوش اللي مبقاش باينله أي وش
و انتي لسه بتضربي و بطلتشي
على كل شكل و كل وش
و فواتير الكهربا بتسحبي القلم
و تردي الصاع صاعين
و فكل حته حنفياتك بنشرب منها
ظلم و قهر و زل و زفت و طين
حتى فغناكي بقيتي منعانا و حرمانا
كل ما نتكلم يا عني تروحي خرسانا
قوليلي يا بلدي
هو أحنا ولادك ولا أني شحتانة
شحتانة و علينا بتشحتي
وأن قولنا فيكي مالخير ياما و ياما
على طول تناولي كمان قلم
و تروحي غضبانة
وأن قولنا أه من كتر الهم
تقومي سحلانا و سجنانا
بجد قوليلي يا بلدي
مين فينا يقدر يسندك
و أنتي اللي طول الوقت
نسيانة و لا سندانا
سندانا و سندانك بقينا عليه
و بمطرقتك نازلة علينا و هريانا
هريانا و سلخانا و أحنا يا عيني
من غير هدوم و جتتنا عريانة
عريانة و بردانة و كل ما نغطي فيها
نلاقي هواكي سحبها
و فعز البرد قام و رمانا
يا خسارة يا بلدي
يا خسارة يا بلدي ياللي كنتي سيرة الحكايات
بقيتي مسخة و أضحكت عليكي كل البنات
و كل اللي بقى داير فيكي
الكراسي الموسيقية و التعلب فات فات
التعلب فات فات و خد معاه الميت
و الحي خلاه في مكانه
لا فضل حي ولا حتى حصل اللي مات
و بهواتك قعدم ع الكراسي و خلدم
و كأن الموت عمره مامر فيوم قدمهم
ولا حسه بحد مات
قلمتك يا بلدي كترت و زادت فينا الآهات
و فكل ثانية بيتولد فيكي يا بلد ولاد
بيموتوا قبل ما تتكتبلهم شهايد الميلاد
و كأنك مصرة تعندي القدر
و عندك عدى العناد بعناد
ياللي كنتي تملي بالخير علينا تصبحي
خيرك صبح في خبر كان و راح في البعاد
و بعادنا طول مش باينله رجوع ولا ميعاد
كل مرة أقول مش حتكلم
لكن يا بلدي مبقدرش و أنا شيفك
بتنزفي .. من جرح خلى قلبك
من حزنه بيبكي بيتألم
و مع كل وجع جواه قلوبنا بتتعلم
أزاي تقسى و تعود ما تعرف حتى
لا تبكي ولا تشتكي ولا قادرة تتألم

مقال البلدي يوكل

يعيش بطيخ مولانا , هو في أحسن من البلدي , ده ولا قطن بلادنا , عاش الملك مات الملك
كل دي شعارات فضلنا و لسه لغاية دلوقت بنقولها و نرددها حلو قوي وقادرين نفهم و نعرف أن اللي ملهوش خير في أهله و بلده ملهوش خير في أي حد ولا فأي حاجة تانية ، و أنا ورغم أني نفسي أهج من البلد دي و أروح في أي داهية عشان أغور من وش الناس و العكننة انما بجد أنا بحب البلد دي مهو مش معقول كل ما حد يتخنق يقول حيسيب البلد و يهج طيب مين يفضل فيها لما كلنا نهج و نسيبها ...,
لغاية كده و الشعارات اللي في الأول دي قايمة بدورها حتى لو مكنش الدور ده باين أو موجود أصلاُ أنما يجي واحد محترم عشان يقوللي تشجيع الصناعة المحلية و المنتج المحلي مسئلة متعلقة بالأمن القومي فلأ و ألف لأ بقى إحنل الأمن القومي بتاعنا زي الفل و محدش يقدر يمسه ولا يهوب ناحيته أحنا ناس جدعان أوي ثم أن أصلاً مال الأمن القومي و مال الصناعة و تشجيع المتج المحلي هو أي حاجة خلاص دلوقت بقت بتهدد الأمن القومي ولا أحنا أكتشفنا فجأة كده أو صدفة أن كل المنتجات المستوردة مفخخة و فيها متفجرات بقت بتهدد الأمن القومي ولا تكنش سجادة الصلاة الصيني الأصلي بتنقد الوضوء أو يكون فانوس رمضان حرام عشان صيني ( يكنش معمول من لحم الخنزير هو راخر ) و بعدين هو ليه الناس قاصدة تستفز بعضها و خلاص و كل حاجة بقت أمن قومي و سياسة عليا أنا بجد أتعكننت لما قريت المانشيت ده و كنت حفرقع من ىالغيظ يعني حضرت المحترم اللي علق هذا التعبير قدر الأول بس يقولنا و يجبلنا حاجة واحدة محلية فيها عيب واحد و أحنا قولنا مش عاوزنها داحنا حتى القطن بنصدره بنرجع نستورده لأ و الأدهى أننا ممكن نروح نشتريه من بره و نكتشف انه مصنوع عندنا بالزمة مش نحاول نغير بجد بدل الهبل اللي بقينا فيه ده دا أحنا أساتذة في كل حاجة كفاية أننا بندي الزبون أو المستهلك ضمان مع البضاعة لمدة سنة أو أكتر عشان لما يروح بيتهم كده و يجرب المنتج لو لآه سليم كده و كويس و بيشتغل يعرف يرجع من غير ما حد يعكنن عليه و يسود عشته طبعاً عشان هي سليمة و خالية من كل العيوب اللي ممكن تتوجد و تكون المهم أنا مش حطول عليكم عشان لو فضلت أتكلم ممكن الكلام ميخلصش و عشان كمان متزهقوش مني المهم اننا وصلنا لنتيجة و حنتعاهد و نتفق أننا مش حنستخدم مساحيق الغسيل المستوردة عشان دي ياي أخي بتطلع البقع و كمان مش حناكل الشيكولاته المستورده أحنا بتاعتنا أجدع بكتير ناشفة و بتعيش و بعدين زي الصابون يعني 2 في واحد أكل و نظافة ما هي حتعمل غسيل معدة كمان و بعدين تعالوا هنا إيه لزمة الأستيراد داحنا بنعمل كل حاجة من أول الفلاية و أبرة وابور الجاز لغاية الفلاية و أبرة وابور الجاز برضه و إن الله حليم ستار

لعل و عسى

حبيبتي يا حلوة يا غالية
يا ام البنات
يا عايشة فقلبي اللي صاحي
بعد اما مات
أنا جيت أصبح لقيتك
يا ام الحكايات
ساكته و لونك يا شمسي
زي البهات
حبيبيتي يا قمرة يا عروسة
يا غازلة الغنوات
يالي العرق فيك بينزرع
يطرح نبات
ميلت أسلم عليكي
و الم الفتات
لاقيتك بيعاه و بحقه
دافنة الآهات
يا ام الولاد يا شارية خاطر الكل
الكل خلاص باعوكي
جنب الياسمين و الفل
و لا عاد حد عليكي
يبص ولا يطل
يا ام الولاد جرالك إيه
مكنتي زي الفل
بتحضني و بتطبطبي
زي النسيم ما يهل
دلوقتي بس بتضربي
و بتشتمي و بتلخبطي
الكل فوق الكل
بقيتي بس بتضربي
من غير حتى ما تلاقي
و اتاري زرعك في قلوبنا
طارح هباب مش فل
أنكسر خلاص سن قلمي
فطعم المرار و المر
بيحلوا فيكي و لأمتى
الصبر طعمه ما حيمر
نفسي أشوفك فيوم
لابسة لباس الفرح
لباس حقيقي مش عيرة
من غي حتى
ذولق او ورد ى فل
و بدل ما عسلك أسود
يصبح نهار ع الكل
الحلو فيكي مرروه
و الصبر فيكي بيحلوه
و أحنا أدينا صبرنا
لحد الصبر م خلصوه
ولا عدش نافع دوا
ولا حتى نافع فل
قال يعني شوفنا الفل
داحنا مشوفناش غير ذل
ذل ايوة ذل
بس ذل زي الفل
فل دبلان يا عيني
من قبل حتى ما يطرح
زعلان على اللي زرعوا
لموته قبل ما يفرح
مهو زي الحاشيش يا سمرة
بينقلع بسكين بيدبح
ينزل دمه سيول
تروح في كل مطرح
تولد من تاني حكاية
يتصبر بيها الناس
ياريتها بس تفلح
***********************
قوليلي ليه يا غالية
مخابية عني عنيكي
معصوبة يا غليا ولا
مافيش حيلة فأديكي
طب أعمل إيه قوليلي
ما انا ياما حاولت فيكي
معرفش مالك بقيتي
مكسورة كده رجليكي
لبتروحي ولا بتيجي
و تعبت معاكي و الله
وأنتي مكتفة أديكي

أضحك يا عم

أضحك يا عم
أضحك بلاغم
على إيه تزعل او تهتم
أضحك يا عم
أضحك بلاغم
على إيه تزعل او تهتم
الدنيا فيها و ياما فيها
إن كان ف قصورها ولا ف حواريها
يوم فالطالع و يوم فالنازل
لكن لازم نعيش فيها
مهما نشوف او مهما نسمع
لو حتى حتعيش أبكم أصم
أضحك يا عم
أضحك بلاغم
على إيه تزعل او تهتم
على ايه تزعل او تضايق
نفسك يعني تقول مش طايق
حتضايق نفسك طب تفتكر حتىلاقي حد حيحس بيك
لو حيقولوا فين يوجعك حتعرف يعني تقول يا فكيك
ربك وحده اللي بيسترها
على عباده و بيكملها
بالصحة و بالستر يا عم
على إيه نزعل أو نهتم
أضحك يا عم
أضحك بلاغم
على إيه تزعل او تهتم

فاكر نفسه ذكي

أنا حقلع هدومي
و حقعد خلاص عريان
ما هو كل شيء أنكشف
و لازم الحقيقة تبان
لازم تشوفي بعينيكي علامات الزمن فيا
لازم تحسي بإديكي تجاعيد الأحزان
أنا اللي كنت طير
ما عمري يوم وقعت
وقع عليا الختيار
و بقيت خلاص مذبوح
خلاص مش حخبي عليكي حاجة
ما انا أصلاً مبقيتش أقدر أداري
لو كانوا أستنوا عليا كانت بانت كل حاجة
هو أنا لو أعرف كنت أستنيت لحد ما يعذبوني
عيبي الوحيد أني مبعرفش أمتى يقف الكلام
مع اني كتير حاولت أخاف من الأيام
لو كنت عارف أن تجاعيد الزمن حتبان عليا
كنت داريت و سكت و عملت عبيط من زمان

قسمة و نصيب

أغازل بنت حلوة على خدها الخال
تمشي مشي الغزالة و فرجلها خلخال
أنده عليها تميل و عنيها ترمي السلام
و تبعت مع الشوق مرسال
يوصل أحلى كلام
أفرح كأني طفل صغير جبتله لعبة
و اجي أقولها بحبك تقوللي لامؤخزة
هو أنت عندك مال أو عندك عزبة
أقولها الغني هو الله
لكن الحالة مش دقة
تقوللي عارفة و ماله
أنا مش طالبة غير شقة
حيرتيني .. جيرتي قلبي معاكي والله يا شابة
و أنا اللي فيكي دايب و فقلبي ميت دقة
أطلب و صالك تبعدي
و أبعد أنا تقولي لأ

واحدة من البنات

أنا واحدة م البنات
أنا زي أي واحدة
أحلامي بسيطة خالص
نفسي محسش بوحدة
أنا زي كل البنات
بحلم أعيش الحياة
مش طالبة منها غير
قلبي يحقق مناه
نفسي ألاقي نفسي
و محدش يملى عليا أرادتي
أغلط و أحاسب نفسي
مستناش يقولوا لي غلطي
ما أنا عارفة فين حدودي
و عارفة إيه قيودي
لو ببعد عن طريقي في يوم
برجع .. مبقولش الوقت فات
و دا حلم كتير م البنات
****************
زيي زي غيري كتير
نفسي أشوف الثقة في عيون
كل اللي حواليا
لما أتعب يشيلوني أولم
و مكنش لوحديا
علشان عارفين أني قادرة
أميّز في الأمور بحكمة
و وقت الشدة مبضعفش
بتلاقيني واقفة
نفسي ألاقي نفسي
و محدش يملى عليا أردتي
أغلط و أحاسب نفسي
مستناش يقولولي غلطي
ما أنا عارفة فين حدودي
و عارفة إيه قيودي
لو ببعد عن طريقي فيوم
برجع .. مقولش الوقت فات
و دا حلم كتير م البنات

متعودتش

متعودتش أقول كلام مش أنا حاسس بيه
و كلامي لما قولته فكرتك حتفهمتيه
حبي ليكي مش لحظة و قت ما تبدأ تنتهي
حبي ليكي حياة لو تنتهي أموت
متعودتش أعيش و أنا مش ملك نفسي
و أحلم أني أطير بجنحات مش حمل جسمي
أول ما اطير تقع .. بيا أوام من كتر حملي
لحظة ما صارحتك بحبي صارحتك بأني خايف
خايف أكون مش كامل خايف أكون مش شايف
خايف أكون مش أنا اللي أنتي بتحلمي بيه
معرفش أذوق كلامي علشان بس أعجبك
أو حتى أبين غرامي علشان ألاقي حبك
ممكن أكون بجبك و مقولش ولا حتى يبان
لكن لو بتحبيني طب ما تقوليها أنتي كمان
مش بطلب منك تحبيني الحب مش عافية
ولا طالب تقوليها طول مانتي مش حاسة
الحب لحظة بتيجي و تخلي قلوبنا صاقية
و أنا لو ميهمنيش أمرك كنت أوام خدعتك
مبعرفش أقلد حد علشان أبان طبيعي
يمكن مبعرفش أعبر بس برضه دا طبيعي
أنما اللي مش طبيعي
أخدعك بكلمة حلوة و أقول لك أحلى غنوة
أو أني اكون غيري و تشوفيني مش أنا
و لما الحلم يكبر جواكي تكتشفيني
و ألائيكي مش هنا
يمكن فيا حاجات تعجب بنات كتير
يمكن فيا صفات مش عند ناس كتير
لكني عارف اني مش حلقى نفسي
ولا ممكن اكون حلمهم
خوفي من فشلي يمكن
خوفي تملي عليهم مش من قربي منهم
و ده مش ضعف أبدا ده أحترام لحلمهم
لو شايفة فيا حاجة تخليكي تكوني جنبي
لو لاقية فيا حاجة تخليكي تكوني دربي
أنا بعلن قدامك خوفي بعلن قدامك ضعفي
و حبي من قبلهم
انما تقوليلي بين أو خليني أشوف
تقوليلي حاسسني بيك
تقوليلي بطل كسوف
تبقي بتقتليني .. تبقي بتسرقيني
بتموتي طبيعتي و كمان بتكسريني
و أنا مش ممكن أكون زي كل الناس
عشان اعجبك أو تعجبيني
انا ممكن أجبلك وردة
و ممكن أكون الوردة
أنما لو شميتي عطري و ملقيتيهوش
تبقي حترميني .. تبقي حتنسيني
ساعتها و للأبد أكيد حتخسرني
و حتبقى غلطتي أني صارحتك بحبي
و خليتك تحبيني

روّق البال

ها الدنيِ قالوا عنها شو ما قالوا
ها الدنيِ قالوا عنها شو ما قالوا
قالوا عنها حزن و غم و هم ما بينزالو
تحتى الله يريد لحبو رحمته ينزلو
أُوف يابا .. يا يابا .. يا يابا .. يا عيوني


روّق هديلي البال بكرة بينصلح الحال
كل شي بالله ماشي و بنرجع نغني الموال
ليلك لو مهما يطول الفرجة قريبة و بتنول
تحقق أحلامك و يدوم الفرح ع طول
يا حبيبي هيك الدنيِ
ساعة حزن و يوم هني
لا تدقلي ع الواحدة بتدوب و بتعب أني
***********************************
يا حبيبي شو ما يصير حبك بالقلب كبير
لو بس تضلك حدي بحس الدنيِ حرير
لو بمشي ع الأشواك أنا قلبي و روحي فداك
ما يهمك مهما قالوا راح أبقى العمر معاك
يا حبيبي هيك الدنيِ
ساعة حزن و يوم هني
لا تدقلي ع الواحدة بتدوب و بتعب أني

متوعدنيش

متوعدينيش
علشان لو روحتي بعيد عني
مش حعرف أعيش
متوعدينيش
خليني بس أكون جنبك
وان كان ده حلم متصحنيش
متوعدينيش
علشان مش عاوزك يوم تحسي بذنب
عمري ما حسيبك
و كفاية عليا حبك يا أطيب قلب
**********************
أنا قلبي مصدق لأكي
و عنيا مصدقت تفرح
و حكمل عمري بدنياكي
و معاكي الأحلام راح تطرح
من يوم ما قابلتك خدتيني
غيرتي حياتي و سنيني
يا ضي طريقي يا نور عيني
و الوقت مهما حيعدي
عمرك ما حتبعدي عن قلبي
ياللي لأيت فيكي حنيني

متوعدينيش
علشان مش عاوزك يوم تحسي بذنب
عمري ما حسيبك
و كفاية عليا حبك يا أطيب قلب

( إهداء للأحتفال باليوم العالمي لأنيميا البحر المتوسط ) نقطة مية و نقطة دم

من وسط موج البحر جايين لكم ياللي نقطة مَية بالنسبة لكم حياة
جايين مدين ايدينا افتحولنا قلبكم و تعالوا مرة نعيش مع بعض الحياة
تعالوا معانا نزرع بقلوبنا ضحكة طفل
مش قادر ع الحياة لا يبص ولا يطل
و لووقفنا جنبه فرحته تبان و تهل

من وسط موج البحر جايين لكم ياللي نقطة مَية بالنسبة لكم حياة
جايين مدين ايدينا افتحولنا قلبكم و تعالوا مرة نعيش مع بعض الحياة
تعالوا معانا نساعد إنسان ضعيف حزين
ماشي الطريق مش عارف نهايته حتكون فين
و مفيش في إيده غير يارب كلمة آمين

من وسط موج البحر جايين لكم ياللي نقطة مَية بالنسبة لكم حياة
جايين مدين ايدينا افتحولنا قلبكم و تعالوا مرة نعيش مع بعض الحياة
خلونا إيد فإيد نفرح بنت شقية
نفسها تلاقي رحمة و شوية حنية
و نقطة دم واحدة مكان نقطة المَية

من وسط موج البحر جايين لكم ياللي نقطة مَية بالنسبة لكم حياة
جايين مدين ايدينا افتحولنا قلبكم و تعالوا مرة نعيش مع بعض الحياة
خلونا نحقق حلم مش ممكن يتوصف
موجود فقلب طفل أمله بيتخطف
يمكن ساعتها يكون ويانا وسط الصف

من وسط موج البحر جايين لكم ياللي نقطة مَية بالنسبة لكم حياة
جايين مدين ايدينا افتحولنا قلبكم و تعالوا مرة نعيش مع بعض الحياة
تعالوا معانا ننسى الحزن اللي علينا فات
و نعيش يومنا الجديد و كأن أمبارح مات
نتعلم منه أيوة .. أيوة و نستفاد
و نخلي أطفالنا تكبر .. تكبر و تكون شداد
و نعايش باقي حياتنا من غير دمع و آهات

من وسط موج البحر من جوا قلب البشر
خلينا نعلي صوتنا منقولش دا انكسر
و نحط أدينا فأدينا و تبقى طوق النجاة
اللي يعدي بينا و يحلي لنا الحياة

لما حبيبي جاني

لما حبيبي جاني
غير لي زماني
خلى الدنيا بقت أحلام
و أنا كنت عايش في الأوهام
و الأحلام يانا حققهالي
لما حبيبي جاني
لما حبيبي جبالني
برمش عينه جتالني
من سحرهم معرفتش أنام
و لجتني فبحر الشوج عوام
أه يانا منه و ماللي جرالي
لما حبيبي جاني
******************
لما حبيبي ندهني
بسهمه فجلبي جرحني
خلاني عايش مش فالدنيا
بتنهد كل دقيقة و ثانية
ولا رحموني يا ناس عزالي
لما حبيبي جاني
****************
لما حبيبي كلامني
لجيته زعلان مني
خلاني أسهر والله ليلاتي
أعد نجوم السما و اهاتي
أتاريني مكنتش واخد بالي
لما حبيبي جاني

روح تحتضر

لم أكن أعرف أبداً أن هذا هو معنى الحب عندك
و لم أكن أعرف أن الدنيا لا تساوي عندك أي شيء
و أمه لا فرق عندك أن أكون معك أم لا
أكنت تخدعني ؟ أم كنت أخدع نفسي ؟!
لقد أحببتك بالفعل و لكن .....،
أنتظر ...
و يحك لا تكذب علي لا تقول لي أنك أحببتني يوماً
لا تسطنع ما لا تقدر علي تحمله
الأن و لم أعد معك ما عاد يهمني شعورك نحوي و ما عدت أهتم
ما عدت أقبل أو لا أقبل ، ما عدت أتحمل أو لا أتحمل
ما عاد بوسعي الأن أن أرفض أو لا ....، و لكن عليك أن تخبرني بشيء واحد فقط
لماذا كان كل هذا ؟ ،،،،،، و لماذا عدت الأن و بعد كل هذه السنوات ؟
نعم أحببتك و وهبتك كل حياتي و وقتي و لكن أين أنت كنت , ثم تأتي فجأة لتخبرني أنك تحبني
أتريد أن أصدقك الأن ؟ يالغرابتك
تهتم بي و تقول أنه عطف و شفقة أو ليس هذا كرم ذائد منك !!
كلا أنه غبائي و حمقي ... ,
أهتم أنا بك فلا تتأثر و لا يعنيك الأمر في شيء
تركتني عندما كنت بحاجة إليك ثم عدت الأن !
لماذا أما لم أعد ملك لك ؟
هذيان روح هذا أم أنني أحلم
سؤال هذا أم جواب من قلب محطم
لحظة ... لحظة ... من فضلك لا تكذب علي لا تخدعني ثانياً
فقط قل لي و أجبني


أتأتي الروح من الجسد أم تأتي من العدم
أهي الفناء من أجل البقاء أم هي النبض للجسد المنعدم
كيف البقاء و الروح قد فارقت الجسد
و هل للجسد أن يبقى و يحيى و الأمل قد أنعدم
أحبك ...
هل أقولها الأن لأنني أعنيها
أم أن الروح تمني نفسها بما يرضيها
قول لي إذاً لماذا أفكر فيك لو كنت لا تعني لي شيئا
أو أعلمني إن كان قلبي يهذي هماً و يأسا
لو أنني مخطئة فلابد لي أن أبدأ من جديد
من حيث ألتقى اللاشيء بالعدم

أحبك...
أتفولها حتى لا تجرحني
أم أنك ترضي غرورا في يوم قد ضيعني
أن كنت لا تعرف فأعلم مني قبل أن أودعك
فبعد الأن لن تقابلني
و حتى الروح التي إذا عادت إلى الجسد
سوف تصبح كالرماد الذي بات من حريق الزمن المنصرم

من التأميم للأنفتاح .. مبارك عليكم

معرفش ليه كل حاجة مبقاش ليها لا طعم ولا لون و لا ريحة حتى .. هو انا كنت في غفلة ما تعرف ، كنت ساهي ، كنت واخد حبوب قبل النوم مش فاهم حاجة خالص ولا حاجة ، بجد أنا من كام يوم أتصعقت فجأة زي اللي صحوه من النوم و هما بيخضوه أو زي اللي في مصحة و بيكهربوه طبعاً أنت حتموتوا و تعرفوا السبب مهو أصل اللي حصل رغم أنه مش جديد بس حاجة مش تفقع المرارة دي تفقع مرارة الجمل معرفش ليه الجمل بس أهه اللي جه على بالي أنا حقولكم أنا كنت بعمل كوباية شاي أعدل بيها نفوخي اللي حيطق و يفرقع و رغم أنه عادي بس انا أتفاجئت لأن رغم عفانة الكووباية و ردائة صنعها و شكلها اللي يخليك تقول دي مصنوعة في مصانع تحت بير السلم مش بير السلم حتى لاقيتها مصنوعة في الإمارات يعني إحنا بالعربي و يمكن مش جديد وعلى بلاطة كده مبقاش عندنا أي صناعة بالمرة من أي نوع مع الإعتذار طبعاً لصانعي بومب العيد الحاجة الوحيدة اللي تقريباً لسه بنعملها هنا رغم وجود صواريخ و مفرقعات صيني تولع فيهم يارب قولوا آمين بس بجد حرام اللي عمال يحصل و يزيد كل يوم عن اليوم اللي قبله ده هو إحنا للدرجة دي بقينا مش قادرين حتى نعمل كوووباية نشرب فيها سم حتى !

تعالوا بينا نراجع القصة من أولها تعالوا .. هما قالوا حنأمم القناه قولنا و مالو مصلحة للبلد و خير حيعم على الكل و أخرتها و طينا و كاتينا و نخينا و فتحنا كمان أم البصلة لما أتاتينا و معرفناش برضه نخلي تعريفة المرور فيها بأم عملة البلد لأنها كان لازم تبقى بالدورار عشان ميصحش تكون بغيره من الأساس و مينفعش و المصالح و كلام الضحك ع الدءون ده سكاتنا راحوا راجعين و قالوا حنأمم المصانع و هبا يلا بدأ التخريب و التنقيب و التعذيب عمال مش لاقية حقوقها عشان الدولة معهاش فبيخربوا الدنيا و يبوظوا الشغل و مدير كانوا أصحاب المصانع قالولك و أنا مالي يا عم هو مصنعي ولا بتاعي و حيخاف عليه ليه بعد ما أتاخد منه عنوة و قهر و عدل و كله قال بأسم الثورة الجميلة المحبوبة يعني علينا فين النسيج ولا حلم السيارات و لا القطن راح فين و النبي القطن اللي فضل يزبل و يتبهدل و يذبهل من العمايل اللي بتحصل فيه و فالبلد لغاية ما بدأنا عصر الإنفيتاح و خدوا بالكوا يا جماعة اللي مش حيعمل حاجة في عصري مش حيعرف يعمل حاجة حتى أنتم يا أخوان و أنتوا كمان يا أرهابيين و انا وانت و طوووول ما الهيرويين شغال ولا انت دماغك بانجو ولا حشيش نقي بقى بمزاجك و سلملي ع التوروماي و هنيالك يا جلاب يا فاعل الخير و الصواب و طبعاً الكل جري و ريقه سال على هدومه و أتهطل و بقينا نستورد و نستسهل و نسهل كل حاجة و نقول المستورد الغالي تمنه فيه و على فكرة يا جماعة دي مش عقدة خواجة انما فعلاً المستورد يكسب مهو لو كان المحلي نفع مكنش ده بقى حاله و حالنا و طبعاً عصر الإنفيتاح و الإنبيطاح
والإنتيفاخ و السريقوسي كان من الأسباب الرئيسية في وجود العطالة و البطالة و ناس معاها بالكوم و ناس مش لاقية حتى الكوم اللي يلمها و وجود فرق بين المواطن و المواطن أخوه المواطن الولاني بيفطر كفيار و يحلى بالسيمون فيميه و المواطن أخوه بيروح يجيب رغيف عيش ناشف و يوقف يشم الفول فيميه المعمي بريحة البصل بس عشان يشم ريحتوووو و يتصطل و يشبع بس من الريحة مش عشان هو كل فول لاسمح الله و حياكل منه أزاي أصلاً إذا كان هو جاب رغيف العيش الناشف المعفن ده بالعافية اللي حدث عنه ولا حرج ده لو مكنش لاقيه و اتصاؤع عليه في صفايح الزبالة اللي جنب الرصيف اللي هو ساكن فيه يعني بالعربي معهوش حق الفول يادوب بس بيشم ريحته و بيدفع الثمن كلمتين في جنابه بجد مش حرام المهزلة دي اللي أستمرت لغاية موعد الحفل الساهر الكبير اللي جه موعده مع أكبرتخت موجود حالياً حفل جوءت (جوقة ) الفرقة الذهبية و بطانة بطانات قاهرة المعز لمديرها و صاحبها الريس الكبير اللي رغم إحترامي لسياسة الخارجية الهايلة تقريباً بس للأسف الفرقة من الداخل هايصة و لايصة مولد و صاحبه غايب و كأنه رئيس مرجيح مولد النبي مش رئيس جمهورية بجد الفضيحة اللي بقت إعلامية
وإعلانية و على الملئ بقت حاجة تقرف فضلم يقولولنا اربطو الحزام شدو الحزام سيبوا الحزام لغاية ما وستنا اتملخ تقولش بيرقصونا مهما كانوا بيحضروا للفرقة فعلاً يا عيني عليا بجد ،

قال و كنا زمان لما نلاقي واحد حمار ولا غبي و مبيفهمش نقوله هو أنت هندي روحوا شوفوا الهند و الهنود دلوقت عاملين إيه و أزاي في التكنولوجيا و ف كل حاجة حتى السينما بجد إحنا بقينا في قمة المهزلو و للأسف الحفل باظ مننا و الدنيا خربت ،

بس أنا عاوز أقولكم أني رغم اللي بيحصل ده انا مازلت مؤمن و مقتنع بجملة و شعار مناضلنا العظيم الجليل مصطفى كامل باشا لو لم أكن مصرياً لودت أن أكون هنديا أو صينياً أو ماليزيا أو إماراتياً أو حتى من القمر واللي يزعل يطق .. يموت و يرووووووح يشرب من البحر كمان بجد انا ناويت أتغير من فترة و فعلاً عملت ده و ياريت أنتوووواااا كمان تبطلوا مية المخلل اللي أنتوا عايشين فيها و تخفوا من أكل التاروطة اللي نازلين فيها حش زي البهايم
و تغيروووواااااااا من حالكم يمكن الوضع المهبب ده يتعدل .

و بس بقى عشان أنتم تعبتولي قلبي و وجعتم نافوووووووخي

مارس

مازلنا في الأسبوع الاول من شهر مارس
لم يأتي الصيف بعد لكن الجو يذكرني
بليالي الصيف الحالمة و جوها شديد الدفئ
الذي فجأة تغمره نفحات من البرد
كل شيء يذكرني بسهر الصيف و لياليه المرحة
أصداء الهواء و هماسات الليل
ضحكات الناس من حولي في المقهي
و أنا جالس أطالع مجلتي و أتابع المارين أمامي
الناس كثيرة و مازال نادل المقهي يرحب بي
و يسألني هل تطلب شيئا
فأجيبه تعرف دائما ما أريد
فيذهب ليحضر لي قهوتي السادة
الساعة لا تتأخر و ليس الوقت باكرا
و لكن الجو المحيط بي مليئ بمزيد من البهجة
التي طالما عشتها في ليالي الصيف الجميل
الجو ليس هو بصيف و ليس بربيع
و كنت أحيانا أتسائل هل نحن حقا في مارس ؟
أم نحن في الخريف فكل شيء يوحي بذلك
كل شيء يوحي ببهجت الصيف
الصيف الذي كان يأتي دائما ثم يودعنا فجأة
معلنا قدوم الخريف بحكاياته و دفئ أنغامه و أعياده
أفكر و أفكر ثم أدع التفكير يغيب عني
هكذا هو حالي دائما عندما اعيش جوا
يذكرني بأحلي اللحظات و أجمل الأشياء
و لكن أعرف في النهاية أنه الصيف
يعلن عن قدومه مبتهجا كعادته

عالم خاوي

آه من بشر تايهة
و آه من عالم خاوي
نفوس في الفضا حيرة
فقاقيع وسط الرغاوي
يقولوا كتير و يعيدوا
في كلام لا معني له و لا بيداوي
بيصبروا جراحهم بجراح
و يحزنوا وسط الافراح
و ان لاقوا الخوف حيقتلهم
يعيدوا من الاول تاني

لبست العروسة طرحتها
فكرت الفرحة صاحبتها
حلمت بيوم حنتها
و امتي حتتزف لبيتها
و يجوا الناس يهنوها
و بالورود يزفوها
اتاري الفرحة غدارة
صورة في الوهم يا خسارة
و نعيد من الاول تاني

مات الفرح قبل ميعاده
سرق الربيع من اعياده
راح العريس و الله في عزه
و كان بيجاهد لاجل العزة
معرفش لحظة يتهني
و لا حقق حتي ما اتمني
اتاري العزة منسية
و الناس في التوهة ملهية
يتعبوا من كتر المنادية
علي عالم تعبان ومخاوي
.

خيال الظل

عيني عليك يا قلبي يا مسكين
دايب عمال تجري وراها سنين
حيران شوقك سهران طول الليل
مش عارف تشكي لمين ولا لمين
و بقيت عامل زي خيال الظل
لا مكان ليك فاضي ولا حتي ظل
خليك عايش كده علي طول يا قلبي
و محدش حاسس أبد انت مين
*************************
طول الوقت عمال تخدع نفسك بيها
فكرك يعني حتقدر توصل ليها
فين منك هي و فين أراضيها
و أنت مش شايف حتي خطا رجليك
و بقيت عامل زي خيال الظل
لا مكان ليك فاضي و لا حتي ظل
خليك عايش كده علي طول يا قلبي
و محدش حاسس أبدا أنت مين
.

( و يا بنت ) آه يا بلد

الفرحة بانت وهلت لما البنية عشقت وقلبها دق
و بسرعة راحت و ولت لما قالولها مافيش عندنا بنات تختار و تدقق
ندهت و صرخت بعزم ما فيها و قالت بسرعة لأ
يا خسارة علي واد حبها و لغيرها قلبه ما رق
و عجيب يا زمن فيك الغلابة تملي ماشين بالذق


و آه يا بلد فيكي ولد شاف الزل من يوم ما اتولد
ذاق المر و ذاق القهر من كترهم نسي طعم الصبر
عطشان نفسه يلاقي سبيل و يلاقي سند
****************************************************
و يا بنت مالك مجروحة و جمالك يقولوا عنه حكايات
خطاب زايدين لكن بورتي من الكتر الخوف و الآهات
أهلك و ناسك يحاربوكي و علي الحبيب يقسوكي
لا ليكي حيلة في حصارك و لا ليكي أي حق


و آه يا بلد كلك حكايات داير بيها منادي سنين ألوفات
حرب و ظلم خراب و دمار و ناس عايشين علي طول في حصار
تايه منهم بر أمانهم و الحق اتجلد
****************************************************
و يا بنت حلمك في عشه ولا خدوه و خانوكي
باعول بإدهم حقهم قال أيه بيصونوكي
لا لاقية أرض تحضنك و لا حد عاد بيعرفك
و كأنك غريبة عن العالم و الكل عليكي أنشق


و آه يا بلد مكسور جناحك تايه طيرك في مساكي و صباحك
مش لاقي عشة و لا حتي ضلة واخد في وشه وعلي قلبه علة
و بيتمني كتير لو كان عمره ما أتولد
****************************************************
و يا بنت خيرك وعطفك علي الكل شمال و يمين
ملهمش فضل عليكي و في عرشك مبرطعين
و منين تجيبي صبر و تلاقي بياعين يقفم معاكي يا حلوة يا ام المتغربين
و أنتي اللي ضايع مفتاحك و علي بابك نازلة دق


و آه يا بلد خيرك مش ليكي متاخد حقك مسلوبة أراضيكي
بتزرعي حب في كل مكان و تحصدي شر اشكال و الوان
و نفسك يوم ترتاحي و يعود الولد

أ.ل.م

أ.ل.م أصرخ يا وطن علي أرض و عرض و دين
أ.ل.م و أشهد يا زمن علي ناس متشردين
أ.ل.م أطفال متغربين يا دموع يا ندم يا أنين
بكرة التاريخ حيكتب
حكياته و مش حيكذب
و حنتأكد مين فينا كان الخاين مين
كان الخاين مين
***********************************************
باعوا القضية بحلها و باعوا مستقبلها
و نسيوا ان الكرامة مبتترميش لو فين
بكرة الزمان يدور و حيجي عليهم الدور
و يتخبوا في سور ورا سور لكن يفضلوا خايفين
أ.ل.م يا حروب يا ناس طاغيين عايشين و مش عايشين
بكرة التاريخ حيكتب
حكاياته و مش حيكذب
و حنتأكد مين فينا كان الخاين مين
كان الخاين مين
***********************************************
مين فينا بإيده عذابه مين فينا بإيده قضاه
لكن بإيمانا نغير مصيرنا اللي بنحياه
أ.ل.م يا خرص انطق و قول لادين متكتفين
أ.ل.م دا طريقنا و لازم نفضل في وش الريح صامدين
أ.ل.م خلينا نقول لبكرة
جوانا عزيمة و قوة و علي الغدر أحنا قادرين
بكرة الزمان حيكتب
حكاياته و مش حيكذب
و حنتأكد مين فينا كان الخاين مين
كان الخاين مين

طظ

طظ في كل اللي بينادي بوحدة أبية
طظ في عالم عاملة بتفهم
و هي أصلا جاهلة و تايهة
طظ في ناس عايشين خايفين
باللي بيحصل كانوا عارفين
إجتماعات و قمة و شجب
إحتجاجات و شد و جذب
كله كلام في كلام و خلاص
و بشر تحت الرجلين بتنداس
حيوا معايا أمريكا حيوا معايا إسرائيل
أكتر ناس عارفين أن وحدتنا مستحيل
حيوا معايا و حيوا حيوا صلاح الدين
و عيشوا بس علي بطولاته و خليكم خايبين
فينكم يا شعوب عربية يا حضارات صبحت منسية
بإديكم سلمتم عرفات و صدام
خليكم بقي عايشين باقي العمر في صدام
طظ في كل واحد عمال يهلل و ينادي
طظ في كل رئيس فاكر نفسه رئيس لنادي
طظ في كل مواطن بيقول قليل الحيلة
دا العدل و الله يا ناس مافتيحه تملي كتيرة
أوعوا تنسوا انكم انتم اصل حضارات العالم
لولاكم ماكنتش امريكا و لا الأرهاب حكم العالم
طظ ياللي بتنادوا بالدين و انتم عاوزين بيس السلطة
ربنا بيكم بس عليم و قادر يفك الكربة
حي علي الفلاح حي علي الجهاد
و طظ في كل واحد معندوش استعداد
يقف و لو للحظة في وش اللي الاعادي
و كل اللي بيعمله انه بيشجب و ينادي
.